教不嚴，師之惰

2012年11月6日（星期二）

星期六做家務時打算開電腦播d音樂，誰知入到window無哂icon，只係淨返wallpaper同mouse個箭咀夜晚請宇正叔叔幫我睇，攪左好奈都攪唔掂，要重新安裝個window先得，不過要揾返隻碟出嚟，所以desktop有排都未用到。好彩的事有ipad頂住當，一般上網都仲得，係無得煲我d美劇囉，因為係線上觀看，ipad做唔到，佢d睇劇apps d美劇又勁唔update！不過宅媽如我，又點會無嘢攪呢！呢排又迷小説了

我發現用ipad寫blog快過用keyboard，因為用筆畫打字順手好多，係無得放相囉

沉重的心情隨着差不多測完驗，放輕了一些，成績開始出來，感覺今年我班小朋友的學習情緒差左，伴隨的當然就是成績不理想，今日放工時同老公講起我班學生的成，老公話我無比家長嘈真係好彩啦！對住呢句説話，我都唔知點講好，應該話我學生的家長都知我盡了力罷？有時係blog上講的monster perants大多係candy姐姐的有時我都係度反思，究竟係是否自己的問題呢？要知道「教不嚴，師之惰」。我班學生（正確來説是三分一班）成績差成咁？教學有十年，一班裏總會有一兩個問題學生，但現在有5個？感覺好失敗！唉！軟好，硬好，各種方法都用盡了，依然故我！不合格也面不改容！天呀！究竟要怎樣做才有進展呢？最慘的是本來無問題的學生感覺開始都出現問題！！

成績一直倒退！學習氣氛越來越差！好失敗！

希望在明天吧！

忙到甩碌

2012年10月9日  (星期二)

 

咩話?!今日先至係星期二???長假期後的weekday好難捱吖~~公司的大廈呢輪維修電力裝置，每次停完電之後總遊問題發生！廁所漏水問題越來越嚴重！頭痛 每日都盡量準時7點半收工.......但.......唉........11月頭測驗了.....開始派時間表了，又開始博鬥

早輪係屋企同宇正塗鴉，佢居然左個A字，細問之下原來係嫲嫲教的！WOW.....見佢咁喜歡做功課(通常未有功課個好恨有功課做)就自製左張工作紙比佢寫，一日一張，一星期一個英文字，慢慢再加數目字，中文落去，習慣左第時做功課時無咁辛苦。



我...係唔係越黎越虎媽呢？(其實宇正都未夠3歲)

無法子...見到補習社班細路....我真係好怕宇正第時好似佢地咁，就係幼稚園太過開心....到一年級時讀得好辛苦，我寧願依家慢慢學，起碼無太大壓力。

香港讀書就係咁，幾活動教學都好，最後都係逃唔過考試呢關！

BACK TO SCHOOL

2012 年9月14日  (星期五)

 

今晚終於o的起心肝打blog，事關開學無奈宇正就病病地，跟住就到我，一日都係病左好奈又唔肯早d瞓，係都要睇埋夜間新聞，第二日又6點幾起身返工o個個囉！野病哂連續兩日隊左杯感冒茶，好返好多！所以寫下近況記錄下先



開學兩個星期，一切運作開始正常返(我講我)雖然成日話呢個暑假無乜點休息過，不過工作量始終係輕鬆D既，一開學有功課有默書有測驗有考試，每日都好似打仗咁，所以雖然工時小，但工作量大架，仲要無得留低聽日做，即日完成


好彩經過上年比班魔鬼訓練後(無錯！係我比佢地訓練)，今年我的LEVEL明顯升高左！希望唔好咁易發火，我仲想睇住宇正娶老婆

宇正係9月5日正式自己坐校車返學喇！頭兩日都係喊住比EE捉上車，去到第三日可以喊住自己上校車，隔左個WEEKEND，諗住佢又會喊喇！點知可以自己上校車，仲無喊添！跟住個幾日直頭可以係校車上同我講BYE BYE。叻仔 ！雖然每朝一起身就問我今日洗唔洗返學，知道要返的話感覺有D DOWN，不過每日接你的時候都見到你不停講做過乜，就知道返學係開心既，要好好ENJOY幼稚園生活吖！

開學無奈，我班學生都開始教書啦！某日，其中一個學生有呢份功課，哇！好HIT的課題吖！



老實講，國民教育其實一直都有，不過無獨立成科，一至六年級每年的常識科一定有一册係講國民教育，中國歷史的，當然內容都係一D基本的常識，一D太敏感的題目係無講的(即係而家所講的當代國情)，作為一個補習老師，我係反對獨立成科的，理由好簡單，開多科未即係要考多科，依家香港既學生壓力都巳經好大啦！不過只要個內容無問題，我係同意國民教育的(唔好話我五毛住)點解咁講呢？今日個位學生要做其中一頁，係問答題，其中一題我見到咁既情況：

誰是中國現任國家主席？

毛澤東  

。。。。。。。。。。死左好奈喇佢。。。

跟住佢行黎問我回歸前香港係受咩國家統治？如果學校唔教，個小朋友又唔興睇新聞，亞爸亞媽又無教，佢身為一個香港人，中國人，連自己國家主席都唔知係乜水，就真係麻麻喇！

不過對於政府取消中史唔係中學的必修科，我就真係唔贊同，歷史就是歷史，可以係一個中立的角度去學習中國的歷史文化，有人話呢個係一個陰謀去推國民教育。我其實都覺覺地

呢件事上，Katherine媽媽都仲係抱住中立同觀望的態度去睇，事實上我補個幾間小學都無獨立成科，加上而家個決定權係學校到，家庭們就係選校方面自己留意喇！

中秋就到，係我未買燈籠比宇正之前，CANDY姐姐就送左個比宇正喇！仲係宇正最愛的MICKEY，宇正真幸福！THANKS~~

無心機

2012年8月15日  (星期三)

今個暑假感覺好似過得好快咁，仲有差不多兩星期就開學了，我d學生都會係聽日返哂黎，補習社又開始熱鬧起來喇！

不過呢個暑假教到我嘔血咁滯，收返兩個之前走左既學生，返到黎簡直不似人型，完全唔當欠交一回事，一句講唔記得做就大哂，上堂剛教完既野，之後同你交白卷，天吖！我真係唔識教落去。

可能有人會問係未我教得唔好所以佢地會呢？呢個問題我都反覆問過自己，一味惡係無用，7歲人基本上係聽得明我要求喇！想好好補習就要好好同我合作。

唔明唔記得？OKOK，我未講多幾次囉！但當一個TOPIC我教足個半星期都唔識？其他人都背到出黎喇！

一想起就快開學，我仲驚！我同CANDY講我直頭有「開學恐懼症」，我好怕自己會爆血管。

話說呢幾日我都係比返二年級的試卷重溫一下，怕佢地錯得離譜，先前己經逐PART講解，用左差不多一個鐘的時間解完先開始做，最後再比一個鐘到佢地做，居然有人攞11分！！！係11分！！！個問題其實唔係在於分數，重點係份卷有三分二係無做到！如果記住我講既重點，又或者係有留心聽我講每部份的例題，點都無可能係咁囉！

呢個問題唔係一次，幾乎每一日都上演，就算我當日幾好心機教都好，第二日又再好似失憶咁，日復日，我真係教到好無癮！！

有時我會諗，家下D細路差成咁咩？又唔係完全係喎！班中都有進步的例子，只能怪我唔好彩，呢班的懶人比例大好多，11個中有5個係咁真係好惡教！

呢日我又再比機會佢地，只係希望佢地改好正聽日唔好又無做喇！不過我都打電話同呢兩姐弟的家長講再係咁落去請佢地另請高明啦！

真係唔想自己每日好怕返工的感覺，唔想自己對教學再無熱誠。

go to work with mamii~~

2012年8月3日  (星期五)

話咁快，個暑假就過左一半喇！感覺無乜點休息過，成個7月不停病病病，難得的一個星期假期，想同宇正好好玩下都無。最慘既就係本來暑假唔洗點勞氣架嘛！我班學生到依家都未做好暑期功課，比着以前，一星期就同你K.O.佢喇！可想而知，我呢班學生有幾懶。我開始覺得自己有小朋友恐懼症，每日返工都好怕同佢地角力，總之，佢一副慘樣，我有理由相信自己會比人激死。

唔講D唔開心野喇！因為暑假，所以每個星期五我地都會活動日，輕鬆一下(係個別幾個無做好自己本份無得玩)。呢個星期五就帶左宇正一齊玩下，Candy姐姐為左就番宇正個level，今堂係做d比較簡單的勞作。

而我，就因為有人未做好功課 (亂做？)繼續改......好地地一個暑假，一個活動日，點解都要我鬧人姐？攪到宇正返到屋企同佢爸爸講媽咪罵人。唉！我就巔喇！

跟媽媽返工作表現得好開心

天氣好熱同焗，不過肯自己企係度等巴士，算你喇

到喇~未夠鐘上堂，攪攪震

CANDY姐姐安排宇正坐主席位方便照顧

就係呢四條友係暑假都仲要我每日激心喇！不敢想像開學後會係點



宇正完成作品後，立即走過黎SHOW比我睇

收工後同CANDY姐姐食個TEA跟住就返屋企喇！

返到去宇正見到爸爸第一時間係我個袋攞幅畫比爸爸睇

見到你好自豪咁款，就知道你今天玩得好開心！

放輕鬆

2012年6月15日 (星期五)

終於終於，全部學生都考完試喇！考得好唔好，都叫做盡左力(我講我)，本應這幾日我都可以hea住教下，每日一份WORKSHEET重溫下前教的，不過我班裡總係有幾條超級大懶虫，存心唔比我好過！唔交功課都覺無事，罵都唔聽吖！唔識咩？我逐題解，寫埋橫式，只係需要返屋企計埋個答案返黎交比我就得。(點解唔係度做埋？2個鐘一堂，我比足4個鐘黎教你，我都要收工返屋企架！)

今日返黎，一個無改，一個直頭無帶！個下我真係着哂，着到連Candy姐姐都驚。應該係連我自己都驚，對住呢d咁嘅人 ，我唔知自己仲可以講乜囉！有教無類一向是我宗旨，but今次我真的累了！所以今日個爸爸黎接放學，我係連個爸爸都鏟埋 (我都話我癲左啦！)跟据兩位當事人的爸爸講述，佢地尋晚改到10點半喎！我想講我要佢返改正的數學大約8-10題到，全部解哂題，列哂橫式，上堂時間兩位千金都答到我和明白錯處，斷唔會要做成兩個鐘都做唔到囉！

一個字 -----------懶

大家想唔想像到我有幾心淡，幾嬲呢！呢位爸爸講左千百樣難處比我聽，我明白唔代表你唔冼教架！頂！我用哂心機教完你兩個女，要你返屋企同我督住佢地改正，咁都攪唔掂，我想講大人細路都係有問題。全科唔合格係有原因的！

其實真係有d想放棄，不過兩個之中有一個有進步，仲差一科就ok喇，我真係唔想放棄住，但每日教呢對孖女真係令我死好多細胞，亦都令其他學生耳仔受罪。所以，我決定跟住落黎佢地放係一邊先，抄下寫下，落堂後連同其他幾個跟得唔係太好的學生再補習，希望咁樣大家都好過d，上課時有效率d。

不過都係個句，我點用心都好，懶係無得教的！

半死不活

2012年5月29日  (星期二)



6月頭就係期中考試了，但我班少爺小姐們完全不在狀態，每日工作就好像是火山爆發。

不知道是不是因為太過勞氣？好幾夜都睡得不安穩，今天早上還心口痛 (因為睡姿不正壓到了)，投身補習行業多年，不知道為甚麼還是看不開，好多時自己都盡了力啦！還勞氣些甚麼呢？教而不善屢見不鮮，一個一個monster parent令人氣憤。

朋友在飯聚時問我某某學生怎樣令我勞氣了？(因為有時忍不住在FB上抱怨了) 如果你不是有小朋友還是同行，真的不知道要怎樣解說給你知。

其實每次責罵了學生都好辛苦 (你估罵人不用氣力嗎?) ，最大的問題是講了道理出來你又明白多少呢？

唉！是我食古不化了還是你太過頑劣了呢？想起你現在只是一個二年級的學生，不敢想像你將來的路會有幾難行呢？

嚴師?!

2011年2月16日  (星期四)




其實我係有d想訓既

不過心裡突然有些想法想寫出黎

舒發下

又因為今晚老公出左去

宇正訓左

靜靜地一個人

寫下blog

無幾何

早排真係有想過荒廢左個blog就算

每日都忙

星期六日更忙

最弊就係開左部電腦

有太多野吸引左我去

不過寫下寫下

原來我都寫左2年喇

有時得閒睇番之前既blog

都幾得意架

當然係度意外地識到幾個啱傾的blog友

就仲開心啦

近呢排

為左幾個學生令我每日工作都好勞氣

勞氣到我想唔做喇

當然現實唔容許我咁做喇

我又真係唔想日日同人開戰

唯有再好好調節自己

講真個句

我知係香港讀書其實係好辛苦既事

除非你係好top個堆

因為成績唔好

就會越黎越無心機讀

無心機到就算有個人係側邊教你

都無心機聽

呢類學生最難教

激將法  懷柔政策

好似做咩都無反應

同爸爸講

爸爸就同我講無法子
(家下呢個年代係無嚴父架喇....好似世界既亞爸都比d仔女食住...我屋企個件都係)

最後....

我忍唔住打比亞媽

(因為一般都係爸爸黎接...所以我好多時只係同佢講左就算喇...)

今日  態度有改善喇

亞媽同我講

其實佢都知道問題所在

不過因為爸爸成日都比籍口對孖女 (無錯...係孖女...所以激氣double上)

話得太多又怕影響家庭和諧

唉......

又邊個父母唔愛自己的仔女吖

不過縱到個人無哂責任心

無哂禮貌

最後未又係害左佢

所以我真係成日提自己

唔好好似佢地咁

講得好似好衰咁

但是我又有咩法子呢

仔女係人地的

就算我係補習社時教得幾好都好

家長唔配合

我都好無奈架

依家每日開工前都會提自己

平心靜氣!!!!!

發夢?!

okok 

平心靜氣!!!!!

十問九唔應?!

okok

平心靜氣!!!!!

問聲你係收得唔清楚吖??

個台收得唔好就轉台喇

野來其他學生爆笑

爛gag一個

自娛也好吧!!

嚴師

死左十世喇!!!

家下係無嚴師了

只有的就是無盡的忍耐和包容

用愛等你(們)慢慢改變

希望有這一日吧!

測驗

2011年11月1日 (星期二)

一個月又過去了

新的月份希望有新的開始喇

近來工作上好有壓力

收生情況未如理想

再加上學生的素質真的越來越差

我所講既唔係成績  係態度!!!

成績唔好  父母要工作

屋企由工人或長輩照顧

通常都需要黎補習

因為唔補習的話無人可以督促完成功課

今年收左兩個新生

都可以話係挑戰我的極限

完全係唔識字咁

教完一下轉頭又忘記

我只能盡力教喇

明天一連三日的測驗

今天沒有甚麼功課

一早預備好試卷

其實都係平時教好的

只係再提點一下

一開始做卷

有人一路望住份卷發呆

其實到呢個地步

我都只有希望佢地可以盡力而為

只係同個位講  「你盡力做喇!」

五分鐘後

佢開始眼神無焦點

跟住訓着左  (正確黎講係「釣魚」)

......

45分鐘後收卷即時對改

13分

一份6版的二年級中文卷

13分!!!!

其實如果你係盡力做而得到13分

我真係唔會介意

起碼個下你有盡力

但問題係連做做下卷都可以「釣魚」既

用心極有限喇

近排教書教到覺得自己好失敗

不停想用甚麼方法幫到呢對孖女

責任心  自覺性  全部都需要建立

見到小朋友的進步好開心

相反的話真的好焦急

又會怕自己的學教質素差了

再影響收生

要run一盤生意經已好難

仲要係從事教育行業

難上加難

雜記

 

2011年9月8日 (星期四)

一到星期四

我就會好開心

因為明天是星期五

明明我講乜呢?

上星期四開學

我同Candy姐姐都覺得時間過得快d

不過呢個星期就覺得好難捱

點解?

比班嘩鬼激到我地生蝦咁跳囉

家下d細路真係好惡攪

懶就一定啦

依家仲要唔知衰架

要係屋企做既無做

問佢點解

佢地會若無其事咁答你   「掛住玩囉」

留堂都以經無乜作用時

罵都無乜反應

唯有自己激心囉

唔好以為我同Candy姐姐無進行過愛的教育

有幾個真係你關心佢都覺得自己哂氣

不過只要有一個係有進步  (都唔只一個既)

我同Candy姐姐都會覺得好開心

唔聽話個d放埋一邊過過冷河先

雖然有monster parent的存在

不過都仲有一d家長好有心

對我地呢班補習老師體諒及關心




又到中秋...收到呢位學生的婆婆送的月餅

由第一年開始補習...呢位婆婆每逢過時過節都會送野比我地

哥哥今年升中一,弟弟五年級

老實講...兩兄弟的成績唔算係進步好多

不過婆婆都好諒解我地...知道成績唔係單方面的

開心唔係在於有禮物收

係在於對我地呢班補習老師的尊重

近呢幾年

真係越黎越多"老馮"家長

比一個補習費

真係以為自己做左人亞媽咁滯

有時遇到學校老師的不禮貌對待

加上種種真係做到個人幾無心機架

不過我同Candy姐姐都真係喜歡小朋友

幾激心都好

都係想教好佢地

之前出席一個舊同學gathering

知道我做補習

都問我家下d細路係未好惡攪?

都幾架

不過鐘意做無計喇