新開始

不知不覺，我寫blog寫左3年幾啦！

收到yahoo blog通知將會關閉，突然有d空虛添！

不過其實自從上年年尾電腦壞鬼左，成4個月無電腦用，寫blog的次數真係越來越少。

加上宇正大個仔，都唔想太公開咁寫blog，慢慢，一個月就得個1篇blog咁滯！

望返yahoo上次update，居然係4個月前！on my god！

不過完全唔寫，就有d唔捨得喎！（呢d未係seafood痕囉XD）

所以，我決定搬家啦！希望呢到唔會執啦！ ＞＜

而係yahoo嘅舊blog，我已back up，等ok收到通知就會慢慢copy過來！

新blog亦改名為：惡C媽媽 vs 百厭囝囝  （wakakakaka..........）

希望呢個blog易用d，咁我嘅update就會快dd啦！

進步

2013年4月19日（星期五）

記得幾個月前寫左篇「我不是虎媽，我是惡媽」，個時對於宇正嘅功課真係好頭痛，我堂堂一個教左10年嘅補習老師，居然攪唔掂自己個仔。個時真係好灰。

事隔幾個月，我唔敢講宇正有神速嘅進步，不過相比開始的時候，宇正畫線條用心左好多。見到佢好用心咁揸住支筆慢慢寫，我真係感動到有d眼濕濕+_+有時佢第日唔洗返學，我問佢聽日做定而家做功課，佢都會話做左先啦^_^起碼唔會拖d功課嚟做。

有一排我覺得宇正d專注力唔夠，好易分心（好多小朋友都有的問題），記得之前睇過篇文章，對於點培養同訓練幼兒的專注力，有幾點留意，好想係度分享一下，好多時候佢地玩玩具，睇電視嘅時候，我地d爸爸媽媽好鐘意係側面問佢地嘢，其實咁樣係會影響佢地，係佢地好專心咁玩時，同時間係訓練佢嘅專注力，令佢地可以好專心做一件事（even係玩or睇卡通，甚至係發呆）），宇正爸爸話我係度比借口自己朝早唔理個仔喎！=_=哈哈哈，因為朝早宇正起身後，除左要沖支奶比佢，佢會自己除片，去厠所，睇書，有時係發呆-_-#，我就可以係張床到補眠^_^

在過佢唔會行出廳，會係床陪住我，唔會好似以前咁，咩都要我陪住先做到^_^

講到為人母，其實我都未係100分。就係因為咁，我要訓練宇正自立d，咁對佢對我都有好處，係我工作上，遇到好多父母成日都同我投訴個小朋友無手尾，書包又唔執，其實好多時候呢d問題都係大人自己造成，佢地根本無比小朋友自己做，一開始嘅時候係怕煩，幫佢地執嘢，到後其佢地都慣左人地幫佢，自己都唔知自己d嘢係邊，有時連個書包裡面有咩都唔知，到最後上堂老師有時派漏功課比佢地，佢地都可以唔知！呢d未惡果囉！

就係因為有太多借鏡，我知道責任心的重要性，一個無責任感嘅人，真係做咩都唔會成功！所以我寧願比人話我係一個懶媽媽，而唔會咩事都幫宇正打點好，屋企嘢都好，只要我覺得佢有能力自己做，我就會放手比佢做。

近況

2013年4月18日（星期四）隨着宇正越來越大個，我要用的體力同精神就越多，到夜晚做完家務就算未瞓都只係想hea下打下機煲下劇，加上同window 7仲未係好friend，打blog打得好唔順手，最後都係用電話打字再copy上去。

如果大家有發現的話，都會發覺宇正爸爸好多時都在工作，就算難得一兩日的假期，都係係屋企附近行下hea左佢，所以呢排真係無帶宇正去d咩特別嘅地方，好再呢個小朋友易滿足，同佢係樓下踩下單車，揸下佢㗎電動車，佢就好開心啦！

好奈都無放咩相上blog，事實上好多時都係我一個帶宇正玩，唔好話大機，部細機都拎唔到出嚟，用電話影得一，兩張，有時仲out fou，係電話又懶得再放係電腦。

所以呢個blog雖然不至於摺埋，不過可能會變成月刊or雙週刊=_=

對於寫卜，我其實仲未放棄，只係力量有限，要做的事太多，如果有咩值得寫底，我都會開blog^_^

係度多謝識嘅，唔識嘅，曾經嚟過Katherine 媽媽平凡日記的你，多謝你地同我分享我們家的點點滴滴^_^

如果有時間update，又比你見到的話，留隻字比我啦^_^

Easter 2013

2013年4月3日 (星期三)

終於,屋企部電腦修理好喇~出blog應該同快d。四日的公眾假期話咁快就過去喇，不過因為宇正爸爸要工作,加上天氣唔好，再加加上我唔C服，所以都無同宇正安排幾咩節目，第一日係屋企休息，夜晚公公黎晚飯，買哂材料黎，同亞妹合力煮左餐飯，第一次整鹵水鴿，味道唔錯！



第二日中午同宇正出街食午餐，叫左個兒童餐

之後行GAP買左衫比宇正同宇正爸爸，再去掉錢樂園玩，反屋企前去行玩具反斗城，買左份兒童節禮物比宇正，其實係好奈之前就講過會買比佢，誰不知無出，今日咁啱又見到，即刻打去問爸爸買唔買，26孝爸爸聽到就當然say yes 喇




因為呢幾日都落雨，出街都同宇正着定雨衣，近呢幾個月宇正高左好喇，成個大個仔左！

 

第三日約左一班朋友黎我到gathering同預祝Candy姐姐生日，生日怫樂~~~~又同你過生日LU~祝你日日都開心~


到假期的LAST DAY 喇，好好彩呢日雖然天陰不過無落雨，下午同宇正食佢最愛的烏冬，呢位小朋友的食量越來越利害，自己差不多K.O.一碗烏冬！

無落雨，終於可以揸架車落街威喇

之後仲玩左bouble同踢足球！夜晚再去爺爺嫲嫲到晚飯~


四日的假期就咁就完喇~好似無做過d咩，不過就辛苦宇正爸爸，呢排佢真係O.T.到暈，真係要好好TAKE CARE 身體~我都要努力做好屋企D野，等你工作時都放心！

 

觀課日

2013年3月12日（星期二）

返左半年有多的K1，好多時都係要靠宇正自己講返做過d咩，學校要小朋友自己表達自己多d，經過成個學期，宇正嘅表達能力其實真係進步左好多。早排覺得佢百厭左，不過呢排又定返d。

知道學校有觀課日（好似係今年先有），我同宇正爸爸都好期待，不過因為我工作的關係，要係school day攞假根本係無可能嘅事，所以呢次都係由爸爸去觀課。

聽返宇正爸爸講述，宇正係學校都算乖，守規矩，睇返d片，見到宇正係課堂上都勇於發問同答問題，知道佢返學返得好開心，我都好安慰，無揀錯學校比佢^_^

唯一覺得麻麻就係教英文嘅修女d口音好奇怪。

當日宇正返到屋企對於爸爸去左學校睇佢上堂感到好興奮，不停講自己幫爸爸收拾餐具同倒水比爸爸飲（學校都預備左茶點比家長食^_^）

希望宇正繼續keep住呢份學習的熱情！

2月

2012年2月28日（星期四）






時間一隔奈左，就提唔起勁寫blog，加上2月過年，初二三四去左大陸旅行，初五就開工，未有心機寫，到個holiday mood好番d後，工作上又發生左大變動，一時間個人好亂。總之借口一堆啦！話時話，其實我個blog除左我班friend之外，係咪無人睇呢？無動力寫blog呢！

每年的二月總是過得特別快（除左閏年多1day奈dd之外）快到呢個月我得2篇blog添！？真係唔知邊到講起！盡力啦！

2月8日（年廿八）

宇正爸爸3X生日，成班老死嚟我地gethering一番！終於食到美心個rainbow蛋糕！都幾好味！重要係個color都會令人開心d


2月9日（年廿九）

今年無年三十，所以呢高就係團年夜啦！宇正爸爸呢日都要開工，收4點幾，所以一整個下午就同宇正hea下玩下，收拾一下，晚上一家人係屋企樓下酒樓食飯，仲係護老院接埋太婆一齊團年，年夜飯，最緊要係齊齊整整。食完食就去花市行左個圈，宇正就獲叔叔送一輕氣球！到今日都仲係天花板到飄浮，勁！

2月10日（年初一）

一早去左老爺奶奶到拜年，之後就出去搵daddy同呀妹，入流淨山同嫲嫲拜年，食完午飯stay到3點先走！坐番車出去食個早dinner，就散！舟車勞動，呀妹仲暈左車浪！爆！

2月11日〜2月13日（初二三四）

一行八大二小，廣州3days2nights！結論，過年唔好返祖國玩，乜都差d，導遊，司機，團餐！all failed！！我地仲要揀貴團喎！比平時差好多！不過宇正呢個trip大豐收，有賢父買左架車（音居）比佢愛兒！，宇正3歲就做車主啦！同行歲幾嘅表妹可愛到不得了！發現宇正吃表妹的醋吃到不得了，但表妹仔就勁痴表哥，成日「哥哥，哥哥」係咁叫宇正，但宇正就唔騷佢，好攪笑！我仲借左表妹嚟扮一家四口（引來fb一些迴響）！雖然我恨女，不過真係無力量再製造多件啦！就等宇正獨享爸媽的愛吧！


2月14日（初五）

開工大吉！今年家長們特別熱情，開工利士多左，大封左，仲收到好幾盒禮！好窩心！情人節節目就係砌好架車比宇正，我收工就外賣壽司返屋企食！


2月21日（星期四）

今日收到一個消息，成個人處於迷失狀態，好幾晚都瞓得唔好，我就係咁嘅人，對於一d唔穩定嘅事係好無安全感！不過經過一輪消化，只能夠説的是隨遇而安吧！

就是這樣，短暫的2月過去了！3月加油吧！

第一次家長日

5～2～2013（星期二）

雖然個卜脱哂期，不過我係會繼續寫嘅！哈哈！

上星期五係宇正第一次的家長日，因為學校安排左4點15分先見，所以就由宇正爸爸去啦！一到4點我自己就係補習社緊張=_=到差不多5點宇正爸爸見完老師就立即打比我報告啦！

總括老師的評語，宇正係學校屬於中間個咋，唔係太差，不過唔係最好個堆，手眼協調需要多加訓練，不過因為佢係細仔，所以應該會慢d嘅，數學麻麻，英文好好（老師仲問我地係咪係屋企成日同佢講）（無吖）好喜歡唱歌^_^（呢樣似我）專注力仲係唔夠！

不過有樣嘢老師就有投訴啦！佢對於宇正係屋企做嘅功課，唔收貨吖！主要係填色填得好求其，其實呢點我係知嘅，每次我都有問宇正咁就得㗎？佢話得我未由佢囉，等老師同佢講，原來每次交功課時老師都有話佢㗎，不過佢返到嚟無同我講，而家老師要求我地要看主佢油好d顏色囉！:D要睇得出佢有用心！明白！我會多加留意的。

宇正比老師的感覺係好得意，好多其他無教佢嘅老師都識佢，重有就係佢好鐘意學校裡其中一個校工ee，仲叫佢婆婆，哈哈哈！如果老師講佢唔掂，叫婆婆講就ok 啦！好攪笑！好似教宇正個個其實係叫張老師，不過宇正成日叫左佢鍾老師，張老師就同婆婆講：「你個孫成日叫錯我吖！」婆婆講：「無問題，等我同佢講。」之後，宇正就叫啱張老師啦！真係好聽婆婆話喎！:D

今次呢個家長日，老師嘅評語同我預期嘅差不多，我都有想過會唔會我太hea教呢？一輪冷靜思考後，我要對自己，對宇正有信心，下次嘅家長日，宇正會有進步的^_^

呢個月宇正爸爸因為有同事傷左，所以星期六，日都要開工，星期六，我就單拖帶宇正去揾公公太太食午飯，再入左去錦田鄉村俱樂部join埋熙家玩！雖然d玩意有d貴，不過宇正玩得開心，咁就抵啦！^_^