K1親子活動日

2012年8月30-31日  (星期四、五)

終於，宇正的讀書生涯開始了，正式開學前學校安排了3日的親子日比小朋友習慣一下，如果坐校車的仲會有試坐添，因為9月3日我無可能攞到假，所以3日我只係陪到2日，第三日就由老公請假做書僮喇
**********************************************************************************

第一日
8月30日(星期四)
當我同宇正講要返學喇！佢就比個咁既樣我

歡容D好嘛？！咁未好囉！開心唔開心都係要返學架喇，緊係開心着數喇

第一日返學未有校車住 ，咁熱，打的喇！

第一日主要係派書，手冊，玩教具(認字，數字，英文字母)比家長知道學校的教具教材係點既，1個半鐘好快就過了，食完茶點就放學。

************************************************************************************
第二日 8月31日(星期五)

第二日著校服時無喊咁口啦！著左校服的宇正，大個仔左好多！仲周圍同人打招呼，係街三唔識七都打喎，我感覺佢認為自己着左校服係唔同D

去到等校車處，因為老師一再提醒家長要小朋友自己揹書包，所以宇正係咁叫我幫佢攞茶點袋，我都無理佢

另外，同佢定左新規矩，着住校服係唔抱既。

校車到了

到達學校，第二日係大肌肉遊戲，未夠鐘上堂時，坐係座位到玩玩具先

學校門口，等買學校運動鞋，本來小朋友去玩彈彈床，不過宇正唔肯玩，死黐住我



買完返課室繼續玩

又係茶點完就放學



**********************************************************************************

第三日

9月3日 (星期一)

因為完全係聽老公口述，佢唔肯偷影相比我睇，今日係美術堂，玩泥膠，宇正至愛，美勞白痴的爸爸都有幫手呢！

茶點時間前老師會帶小朋友去洗手間，之前兩日宇正死都要我跟住，不過因為廁所唔比男家長入，所以就係咁宇正比老師捉左入廁所，老公形容當時宇正死命捉實爸爸的手，不過老公唔理三七廿一由老師捉宇正去，好壯烈的情景咁話，之後因為宇正仲聽到廁所門口有爸爸把聲，扭計喊哂唔肯去VV，老公索性返入課室等。

等左一陣，宇正係最後一個入課室，樣子正常不過，完全無喊過的跡象，仲好開心同爸爸say hello添！即係頭先扮哂蟹啦

老師仲係課室上讚呢個爸爸做得好，威啦你

**********************************************************************************

三日的親子日就咁就過左喇！休息一日(星期二係K2,K3開學日，K1放假一天)星期三宇正就要自己坐校車返學喇！

希望宇正快D適應喇！