2012小總結

2012年12月31日（星期一）

又一年了，真係好驚訝自己可以keep住寫blog寫左2年幾，雖然唔係每日update，但好欣賞自己堅持到，人越太，記性會差，加上我大頭蝦，好多野到會忘記，得閒睇返自己寫嘅野，可以回味一番呢

講返2012我們家有咩轉變呢！要數應該就係宇正9月正式成為K1生了！返左學，個人大個左好多，講野叻左，駁嘴仲叻而媽媽我都一路調整教育宇正的方法和態度，老實講，要我好温柔就難㗎啦！我都唔係呢類人，不過我希望自己能夠成為一個道理媽媽，惡就實有架啦，只係惡媽背後宇正明白媽媽的用心，唔好成日話三歲人仔唔知你講咩（我奶奶成日話佢唔明），但其實我覺得佢咩都明囉！

記得早一輪突然好擔心宇正的學業，攪到每日教佢做功課時好似打仗咁，而家諗通左，其實佢有良好學習態度，呢d唔係我一直要的嗎？個個小朋友都不同，唔好比，差d犯左家長最易犯的毛病---比較！

為左比我同宇正好好放鬆一下，放聖誕假第一日就陪佢做哂d假期功課！放假呢幾日只係奈唔史用ipad同佢温下數字同中文。

學習之路漫長，一步一步來吧！


工作方面，自從補習社搬左上樓後，收的學生好像每況越下，定係我唔好彩呢？12月尾放聖誕假前，收到電話有兩個學生停補，唔開心當然有，每日學生我都用心教的嘛！不過一日過後我釋懷了，收左佢地後，我每日都嘔心瀝血，但都見唔到進步，講過數十次要趕佢走，都係做唔出！而家佢自己放棄，好過一直拖落去，希望佢地參加學校的補課後會有改善啦！

家庭方便，今年和老公成日都有小爭執，不過幸運的是最後都雨過天晴2012年過去，希望2013年更好！

Strawberry

2012年12月26日（星期三）

 

我個blog接近close的狀態，不過係接近姐，仲未呢個christmas如往年一樣大班朋友齊齊BBQ！小朋友們就最happy，個個都收到好多聖誕禮物

25號開完party，26號無掟去，對上一個星期日join唔到朋友仔去摘士多啤利，聽返𤋮媽同樂媽講好正，加上交通幾方便，坐火車到粉嶺再轉小巴就到，所以決定同宇正去玩下，宇正今日有兩個第一次添，第一次摘士多啤利，第一次用交剪（其實唔知宇正學校有無教呢？）不過一路都無機會教佢用交剪，所以初頭都有d驚驚地！誰不知宇正用得幾好喎！



準備出發時收到𤋮媽電話，話無野攪join埋我地，叫我地去先，摘住等！



Ooh！今日去到剛好撞正有tour，好多人呢



去到宇正急不及待想衝去園見佢雙眼發光，即摘一粒比佢食（其實唔可以㗎，乖嘅小朋友同媽媽唔好學呀）





之後就大鑊了，宇正每剪一粒都話呢粒食得啦！見𤋮𤋮未到，爸爸建議先揾個地方坐底，洗乾淨先食，當然好啦！再食落去我怕宇正肚痛



坐底洗乾淨d士多啤利後就開餐啦！我不停搣，佢不停食，自己KO左廿幾三十粒士多啤利！我食得一兩粒咋



不過味道真的不錯，清甜，肉嫩，似韓國種，價錢都合理，50蚊磅

食完差不多無奈𤋮家來了，再摘過


摘到差不多了，兩位小朋友就周圍行行企企



熙熙話隻手dirty，我攞張紙巾叫宇正幫𤋮𤋮抹，好有大哥哥感覺呢！

見時間差不多了，散band，離開前係士多啤利園門口shop左一陣，好多農民拎d農作物係度賣，忍唔買左d胎菊，ok抵吖


兩位小朋友周圍行，好多婆婆請佢地食嘢！當然係宇正呢隻為食貓帶頭啦！佢去到檔口前走去問人地呢d係咩嚟？小童奸計！

6點幾返到屋企，坐一陣就係屋企附近食個晚飯！happy day！

我不是虎媽，我是惡媽

2012年12月12日（星期三）

每晚接完宇正返屋企第一時間就是做功課，每日大約有兩頁功課，學校而家教的都是線條練習，今晚宇正爸爸要夜返，得我一個湊仔。

唉！好明顯，教自己個個同人地個d係唔同，對住宇正，我似乎一d方法都無，結果，教到有人喊到嘔！我真係覺得自己好失敗，見到宇正不停喊住話要叻比媽咪睇，要乖，我自己都想喊埋一份！宇正唔係怕做功課，不過做得好求其，只係跟住虛線畫圓形，都畫到出哂界，講多兩句，就喊到收唔到聲！

如果比宇正揀，我諗佢實唔願意媽咪教佢做功課！

沖完涼慢慢同佢講返頭先點解媽咪罵佢，佢話媽咪唔乖，哈哈哈！在於佢來講，鬧人就係唔乖，因為媽咪鬧baby（宇正的自稱），所以媽咪唔乖，佢仲話，爸爸乖同baby乖，媽咪唔乖，重要重覆幾次！

我同佢講，因為你頭頭先做功課時唔認真，所以媽咪唔開心同嬲囉！而家你大個仔啦！返學啦！做功課唔可以求求其其，如果唔係老師見到你d功課會唔開心㗎！

講到老師唔開心，佢又喊過啦！唉！我知道你想做好比人睇，要加油！

而媽咪都會好努力改掉自己的心急和壞脾氣，比多d時間同耐性比你！

大家一齊努力吧！

希望寫完呢篇blog會好瞓d，諗起頭先宇正的喊樣，心痛吔！真是罵在兒身，痛在母心！

又來近況

2012年12月11日（星期二）

(用宇正爸爸部notebook放張照片,大個仔了很多的宇正^^)

見到呢個blog仲未有相，就知道屋企部desktop未整好！我有理由相信部腦有可能要下年先整好！XD

為免個blog D塵太厚無相blog，頂下先啦！

上回講到我同宇正都病左，其實都好得7788，不過我d咳仲未好，d痰呢，成日kick係度，有時仲her her聲！唉！再唔得，我諗要睇中醫慢慢攪，今云真濕滯！

又講下宇正的近況先，返左K1都有差不多一個學期，最大的進步就係講嘢叻左好多，近呢個月，開始識講下學校發生咩事，例如有一日放學返到嫲嫲到爺爺見佢條運動褲唔同左樣，寫住學校名係度，問佢咩事，佢話去厠所時整濕左，姨姨幫佢換左條褲，因為爺爺嫲嫲唔會開佢書包睇，夜晚交收時爺爺同我講，返到屋企見書包果然有張字條寫左，原因同宇正講一樣！

學習方面，唔知係咪今年轉左校長，有K2K3的媽媽話今年d功課淺左，雖然自己係補習老師，不過其實對幼稚園的課程都唔係太熟，在於我嚟講，學校固然是重要，但家長自己都要教育。就等我係度記錄一下宇正大約識d咩，A到Z大細楷，基本上全部認到，寫方面，仲係教寫大楷，而家識寫ABCDEFHLOPQT，唔係順次序教，而係因應佢可以掌握的筆法而教！不過呢，宇正個人心急又無耐性，又專心唔到，淨係每日學校功課都教到我幾勞氣，又唔可以太惡喎，唔係又係得個喊字！宇正爸爸成日叫我唔好比，其實唔係比，係頂唔順佢做哩太求其姐希望大d會有改善啦！

講左英文，中文呢！大件事了，我發現，學校教過的字，佢差不多完全唔記得！學校到而家為止教左3本主題書，字詞方面有第一課（洗手，老師），第二課（眼，耳，口，鼻，手），第三課（爸爸，媽媽，哥哥，弟弟，姐姐，妹妹）宇正只係認到幾個，因為之前d 識字卡有埋圖畫，而家我剪學校書後的親子教材字同圖係分開的，宇正的認字能力即刻跌哂level！ oh my god！要用d時間同佢認下中文字先！

我都話中文難過英文啦！而媽媽我又係懶，只係掛住教英文，唔全面

除左學術方面，一路都有同宇正睇故事書，只要個晚佢唔係飲奶飲暈左！臨瞓時一定有story time！講故事呢part，媽媽我都幾有信心，話哂讀書時都攞過下獎小學時我攞過故事演講比賽冠軍㗎，所以都培養到佢愛看書的習慣

相對好多香港家長，我並唔係太虎媽！只要宇正的學習態度正確，就ok了！所以真希望佢能夠改善下hea做功課的態度，如果再咁落去，我怕一到小學，我們家的眼淚會激增！幼稚園我都仲忍下你，到小學你仲同我嘻皮笑臉，實比我鬧爆！

希望下篇blog可以放下相，再係咁我怕我會越嚟越懶寫blog（自己懶就懶啦！）

近況

2012年12月2日（星期日）

電腦仍然未整好，無相的blog唔知仲有無人睇吧？就等我略略講下我們家的近況吧！

11月開始，宇正逢星期四朝早學畫畫，第一堂喊哂口話唔要去，到落堂就同我講好鐘意畫畫。你鐘意就好！

上篇blog講到我同宇正都病左，本來都好得七七八八㗎啦！點知轉一轉天氣又嚟過，今次係氣管敏感，喉嚨發炎，唉！希望病魔快快離開我地啦！

11月尾個星期六日成個family上左大陸玩兩日，酒店團，輕鬆一下！

而今日下午，我地就同同校的小朋友來了次gathering，因為有其他媽媽係facebook到開左group，閒時大家都會交順學校資訊，有媽媽提議約埋一齊大家見下面gathering一下，就造就今次的聚會了！本來打算野餐，不過天氣關係改左係clubhouse，有媽媽係自己屋苑個clubhouse book左間房，玩完之後就去playroom再玩，本來野餐我就唔join㗎啦！不過地點改左勁近屋企，仲要係宇正叔叔住的屋苑，當然就去湊熱鬧一下。時間關係無整野食，只係買左2打fruit tart，懶人一個

無咩特別節目，小朋友跑跑跳跳，都已經好開心，食完嘢因為實在頂唔順（d藥食到個人暈駝駝）提早離開！夜晚約左兩個好朋友仔上嚟我到玩！兩星期無見啦！

天氣咁凍，打邊爐最啱！宇正去到6點幾頂唔順要眠一眠先有精神食晚飯，媽媽我可以安落地食！7點到自己醒，再自己食左碗牛肉烏冬！又有精神繼續玩啦！

報告完畢！goodnite！