遊足一日

2012年7月29日  (星期日)

呢排心情無理由地煩燥，睇乜都有d唔順眼，深受其害的都應該是身邊個位喇！再加上宇正的臭脾四升級，有時簡直去到對着幹的地埗，依家有爸爸的時候，佢係唔會要媽媽的。唔想再講喇！

今日去左個幼兒展，比我想像中細，我地只係逗留左30分鐘到就閃喇，成個下午就係emax同mega box遊盪，老公話我地好似街童喎！夜晚叫daddy黎join dinner，食完打的返屋企。

完。

-------------------------
photos
-------------------------

最後，祝我心情早日愉快！

私家影樓

2012年7月28日  (星期六)

依家好多有小朋友的family都會比錢出街去影樓影沙龍，留住美麗時刻，我地好好彩有個喜歡玩攝影的好朋友，仲專業到買左成套影樓器材係屋企，影靚相？so easy！yeah~

本來約好3個小朋友一齊校服影架，不過宇正2個老死要瞓午覺，起唔切身，下次喇！

因為熙爸影開熙熙，要幫宇正影，的都無咁易，一個鐘都唔洗，就影好呢輯靚靚校服沙龍喇！

之後成班朋友gethering一番，辛苦熙媽煮左餐豐富的晚飯招待我地呢！yummy~~~

放幾張沙龍比大家欣賞一喇

穿起校服的宇正，唔似K1，似K2生多D！大隻B一名！

呢晚10大3小飲飽食醉，盡興而歸！

外話： 

百厭又胆小的宇正，玩電話時唔小心跌左陪電話落地(好彩無跌爛)，比大家「哦」一下，嚇到尖叫爆喊，之後就算唔係話佢，只要聽到有人「哦」，即時眼紅。雖然佢個樣又真係幾慘，不過真係忍唔住想笑！亞仔，怕死就唔好咁百厭喇！唔好下下要我做惡人至得架！

近來要我發惡的次數倍增，我都係度諗係未我要求太高呢？不過見到有人用厭惡的眼神望住發爛中的宇正，我的EQ往往化為零！  最慘就係身邊個個成日做好人，變成我裏外不是人了！

教仔的態度和做法真的好待改善，希望我會做得好喇！

希望宇正明白媽媽其實是好錫佢的。

颱風過後做過乜？

2012年7月26日 (星期四)

一個星期的假期很快就過去了，因為病左，所以基本上都無帶過宇正去邊到玩，星期一開工時把聲仲係沙既，不過都係要勞氣，所以放工後係仲沙既。

不過我呢種放假先黎病，一返工就應該好快好喇！

星期二請左假帶宇正去幼稚園買校服，幾驚因為個風要改期吖！！好彩朝早10點幾改掛3號波，如期進行！

喜歡呢間學校除左因為歷史悠久之外，還很喜歡佢既實際，話說去到我想買2套校服2套運動服，老師建議我一套運動服應該夠喇，因為星期二、五着運動服，洗得切，又同我講小朋友大得快，好快又唔啱身，到時真係唔夠可以隨時返學校買，其實佢地可以唔洗理我買幾多架，個日又勁多k1新生，佢地忙到暈。

買好哂喇！2套校服、1套運動服、1件冷外套、1個書包、1個茶點袋、1個連蓋膠杯仔、1個食物盒 。500蚊有找，真係實惠到無朋友！

跟住就上二樓排隊交校車錢，本來打算送宇正返學的，不過計過坐校車佢同我都會舒服好多，問過校車公司，1:30返校，我地屋苑1點到上校車，自己坐車返學到仲要行一大段路，個段路仲要係無瓦遮頭，好天曬落雨淋，校車送到學校門口，所以唔洗諗都知道點選擇啦！

呢日叫埋宇正嫲嫲一齊去，一來幫下手，二來嫲嫲都要知幼稚園實際位置，第時有咩特發事都可能要嫲嫲幫手接放學。

呢隻小鬼一有靠山係度就曳到無朋友，個個小朋友都乖乖跟住大人排隊，呢條友走入去課室攪攪震，最後比老師叫返出黎，羅爆

落雨濕漉漉，攪掂一出學校門口好好見到架的士，一架車上左奶奶到，本來想同宇正去行食個tea架，不過比奶奶band左，佢話佢個度好多野食喎！(but我個point係想宇正行下嘛！唉！)

算喇！都明白奶奶想返去看住表妹仔同工人姐妹姐既！

返到去叫宇正着多次d校服比我影相whatsapp比老公睇！

d校服係味好old school呢？尤其是個書包，正到痺！！聽閒1971年創校到依家都無轉過d校服，唔花巧，我鐘意！

3點幾上到奶奶到，打電話同Candy姐姐聯絡了解一下補習社的情況，個風真係好勁，鎖好既窗都比佢吹爛個鎖，好彩隻窗無跌落街咋，暫時用繩縛實，再叫人黎整，出面露臺d水去唔切，變左水塘；好再d膠紙頂得住，入水情況唔算太嚴重。

4點幾見有少少餓，發現被昆，只有白麵包食，再黎就係西瓜！(我想食熱食！)

hea 到成份報紙睇哂，望住宇正無無聊聊爬黎爬去，比嫲嫲叫住停，都明白點解宇正係樹會百厭d，佳因d細路你越叫佢唔好，佢就越做比你睇架嘛！

食埋晚飯就返屋企啦！返屋企前忍唔住同宇正行左轉超市。

最後決定，下次想hea，都係係自己屋企好喇！唔再懶煮飯喇！
 

三十而立

2012年7月21日   (星期六)

 

<<子曰:  吾十有五而志於學， 三十而立， 四十而不惑，五十知天命，六十而耳順，七十從心所欲不踰矩。 >>

三十而立，是說在前面階段的學習和充實自己修養的基礎上，確立自己在為人處事，對待生活的態度和原則。

仔細思考一下，覺得自己也很明確的知道自己想要些甚麼，身邊朋友不多，但全是知心友，足矣！

立志25歲建立自己的家庭，成了；立志30歲前生小孩，生了。

妹妹說我很利害，爸爸說我很簡單。反正生活在於自己的看法，簡單也好，利害也好，自己覺好便足夠。

遇到難關時，咬緊牙關，雨天總會過的。可以不開心，可以失望，可以憤怒，可以傷心，但都不要太久，因為不值。

懂得知足便是快樂的源頭。可以為一件小事快樂一整天，是一種福氣。

三十而立，我相信自己是立好了。

星期一至五

2012年7月20日(星期五)

本來呢個星期放假，打算同宇正好好玩下，不過星期二開始，我門牙下的牙齦痛，星期三仲腫哂，無啦啦整個牙齦發炎，痛到食唔到野，又瞓得唔好，邊到都唔洗去啦！星期三中午去左睇中醫，下午宇正跟嫲嫲，星期四食多次中藥未見好轉，又轉去睇西醫，又一堆消炎藥抗生素！唉！咁攪又點會唔虛火勁吖！

本來打算星期三同宇正去太空館去唔成，星期四起身係屋企食完午餐後玩左一陣玩具，落左街睇醫生同買餸，要係屋企等奶奶攞中藥嚟比我，等到差不多三點先到，之後奶奶同宇正係會所泳池玩左一個鐘，返到屋企飲完奶就瞓左個幾鐘午覺，直到爸爸放工打電話返嚟先醒。

同唔到宇正去玩攪到佢無趣，日日都話要去嫲嫲個到，唔騷我吖，幾現實吖！心傷！

本來星期三約左daddy一齊同宇正去太空館行下，不過因為唔舒服取消左！改左星期五黎同我預祝生日。呢個星期都無同宇正去過邊，就同佢去行轉反斗城，食個tea，再玩轉冒險樂園喇！

呢幾日天氣都好焗熱，所以都係的來的往。返到屋企見宇正攰攰地，比支奶等佢瞓一陣，我就承機同daddy談談心，宇正6點瞓到6點9，佢起身就開始煮餸，因為我都仲係唔係太咬到野，所以daddy買左魚同白菜黎比我煮，原來煎馬友好好味架，好香魚味！like it~

7點半老公返到，收拾好碗碟就切蛋糕喇！曾幾何時，我係非常着重生日蛋糕呢回事！依家就無乜所謂喇！人大左反而唔好意思要求咁多野！不過daddy呢就唔同，我係佢個女嘛！就算幾老都好都仲係佢個女，wakakaka.....呢個蛋糕係我自己requests的，超愛佢有少少咸味的cheese(似足我)不過因為cheese食太多會好滯，所以我只要求一個mini版就ok喇！

對上2月老公生日時都係買左呢個cheese cake，宇正都唔喜歡食既，無想過今次佢咁喜歡食，食下食下食左4份1。正！以後有人陪我食呢個cheese cake喇！

明天正日生日會去奶奶到BBQ，係一個月前以經約好喇！以我依家咁既狀況，都食唔到d乜架喇！不過成班人開開心心，belibala一番，亦是一件賞心悦目的事！

就是這樣，我踏入我的30大關了！

有宇正唱happy birthday比我聽，幫我吹埋candle，切埋第一刀cake，30歲？take it easy 喇~

------------------------------------------------------------------------------------------------------------------------------------------------------

photos on Monday

----------------------------------------------------------------------------------------------------------------------------------

photos on Tuesday

----------------------------------------------------------------------------------------------------------------------------------

photos on Thursday

--------------------------------------------------------------------------------------------------------------

photos on Friday