又病了 >"<

之前六個月宇正嘗試了他的第一次生病，心痛和身心疲憊了一個多星期，27號晚接宇正回家已發覺他有點咳，呼吸有點不順，一到了晚上睡覺，更發展到咳醒，每隔一小時就咳醒，因為睡得不好，到了早上11點有一些燒，所以嗱嗱臨BOOK醫生。叫了嫲嫲下午來幫助帶宇正去看醫生，等到下午三點，終於到我們，可以出發去醫務所。

其實我唔係唔信西醫，不過上一次睇醫生，開D藥有D唔夾，攪到由喉嚨炎變氣管炎，加上上次醫生有D趕時間，感覺上斷症時有D求其，所以今次去睇醫生我問得好仔細，同埋同醫生講上次D藥唔係太得，可能我講嘅事太直特，加上我有話最後去左睇中醫(其實係去位元堂買左猴棗散)，醫生就開始發老皮，講左一大埋令我好難受的說話。咩叫我而家可以立即走唔駛睇佢呀，唔收我錢叫我走呀，開始的時候我都可以好冷靜話：「醫生，我唔係唔信你，但我想問清楚D姐，如果我唔信你，我BB就唔會一出世就睇你喇！」點知道阿醫生越講越勁，講到：「你地點會知道個BB有幾辛苦......(下删幾百字)」我就真係比佢TAC着，醫生，我就係知道佢好辛苦瞓唔到，我先至怕D藥唔得所以講清楚上次嘅情況比你知姐，我成晚抱住佢，我會唔知道佢有幾辛苦.........之後我仲講到情緒失控-----喊。 (真係唔好意思，今運嚇親宇正嫲嫲，不過識我嘅都明白我有呢方面嘅問題-----喊包病 *__*)

我想講嘅係，自己嘅小朋友病，做父母嘅已經心痛萬分，對我來說，真的是切膚之痛，可能我言語有點不當，但身為一名醫者，我覺得你唔應該咁去大一個個心都亂哂嘅媽媽囉！好老實講，如果唔係宇正BABA同宇正嫲嫲覺得呢個醫生好，我轉左醫生十世喇~ >"<

醫術好重要，但是我覺得醫德都好重要囉！

呻完喇~~~各位有唔同意我嘅講法，唔駛同我講，我知道我一講中醫就死得(西醫生死穴)，我知我啦嘢。都唔好問我係邊個西醫，朋友的知道就心照得剌！

P.S.唔知咪怕左我，今次醫生轉左一D藥，宇正食完之後都有好轉(唔係好似上次咁惡化囉)，不過星期一應該都要覆一次診。