回憶錄~生仔過程~1

感覺:

一個字--------痛

雖則話有心理準備，不過人人嘅接受能唔同，可能我咋啦~

我的預產期係10月21日，宇正係21日出世，準時呢？！不過過程真係好漫長~

10月19日:
瞓到1點幾起身，去廁所時發現見紅，打比老公，因為唔係太痛，又未穿羊水，所以仲落街食完飯，再屋企沖涼，等老公收工先去醫院，入到醫院，姑娘check開左一度，辦手續入院，因為屋企同醫院非常近(行路10分鐘到)，老公陪到9點幾10點先走，個時嘅陣痛仲接受到，為左想開快d個度數，我仲係醫院條走廊渡左成晚，仲比姑娘話我做乜唔瞓(我根本瞓唔着)。

10月20日:
由於前一晚瞓唔到，今日wing wing 地，不過都仲頂得仲，陣痛感覺仲頂得順，個日下午我仲打比寶e叫佢如果未仲羊水都唔好入院住(個時寶e待產中~文樂11月2日出世)，費事等餐死，旁晚，醫生嚟check，係我游說醫生比我番屋企等嘅時候，醫生話我開到2度喇~叫我唔好番屋企喇~
就係醫生check完，漫長嘅痛苦生仔經歷，正式展開~
老公收工後立即嚟醫院陪我，就係呢個時候，我嘅陣痛勁左好多，勁到我開始頂唔順，行唔到，坐唔到，瞓唔到，老公叫我番上床休息下~但個時根本痛到唔知點好~痛嘅部位-----腰！
係呢個極痛嘅時候，老公都幫唔到我d乜，所以我叫佢番屋企休息下~等我電話啦~
番到房，瞓唔到落床~坐係床邊，痛到~~~~~唔敢叫，怕嚇親人，頂左個淩鐘到，忍唔住叫姑娘~不過其實都無嘢幫到我~
呢個時候------依然開得2度-----死未~~~
因為無乜點瞓，體力同精神消耗得好快~晚上11點幾，崩潰~~~哭~~自言自語，頭撞床，不停細聲叫救命。
對面床個大肚婆，睇唔過眼，同姑娘講：「姑娘，你地揾人理下佢啦~佢好辛苦呀~就快頂唔順啦~」
個時真係好感動，因為好多人都等緊生，政府醫院人手唔夠，姑娘都好忙，我有痛到出唔到聲，有人幫你講說話~真的好感動~
姑娘嚟幫我check~都仲係開2度~我崩潰地同姑娘講：如果E家都仲係2度，我無信心可以頂到10度！我無瞓過，好累，E家有痛到坐又唔係，瞓又唔係，企又唔係。
最後決定做無痛，不過樓下產房爆哂無位，要等，但呢個時候我又點等呢？所以姑娘幫我打止痛針，個時我都爭扎左好奈，怕打針對BB唔好，不過個時真係頂唔到啦~
12點幾~有位喇~被推落產房~止痛針嘅效力令我無咁辛苦，打電話同老公講我情況~落到去，自己個間房，駁好儀器，等~~~~~~
零晨3點幾，止痛針藥刀開始無，有好痛啦~~個時無人係房，叫左成個鐘先有姑娘入嚟~(個日好多人生)姑娘話因為醫生係度做手術，無人得閒同我做無痛，咁可以點？等囉~~~
5點幾，醫生終於得閒啦~簽紙~無痛~終於可以休息一下~

待續......