意外

2011年8月28日  (星期日)

去到第十堂playgroup喇

係上堂前

媽媽唔小心令宇正撞到額頭

淤左吖 >"<

心痛死我喇

sorry吖...宇正bb 

媽媽實在係太大意喇


今日和之前一樣都係好似家長日咁

老師同每個家長傾計同派成績表

明顯地宇正b係有進步既

不過專注力仍然唔夠

呢方面婷婷老師比左方法同意見比媽媽

等我係屋企可以實行

thanks a lot ^^

本來打算報starting blocks 的面試班

不過因為行政上的問題

令我再次失望

唔報佢喇 >"<

轉下新地方玩下好過

激C人

事原早上個星期晶晶姐姐打電話黎話9月初開班

問我有無興趣上

因為前同爸爸商量上既

所以都叫佢留位比我喇

下堂上的時候交學費

上星期婷婷老師請病假

無得上堂

今個星期上堂先可以交到學費

去到COUNTER同佢講

佢話個班FULL左喎

要另外開一班  4點15分
(本來3點-4點)

其實幾點上唔係一個問題

我最最最唔鐘意既就係一早係電話講左留位

去到你同我講FULL左???

有無咁做事架

我自己開補習社都唔會咁喇

話左留位就會留住比個學生先

尤其是熟客仔喇

我都係度報左20堂喇

話左返就返喇

上堂交唔到學費唔係我專登唔交架麻

就算係吖...你都可以打電話比我同我講吖??

唉.....都係個句....

如果唔係宇正上得開心

我就真係唔會報佢吖

行政上的做法實在是不敢苟同

可能自己都係半個同行喇
(補習社都係做小朋友生意)

比較執着呢D事

放學後又是3Bs GETHERING

地點我屋企

樂樂訓左

所以得熙熙同宇正去playroom玩玩玩

又有熙爸靚相喇 ^^

見唔見到宇正個額頭??

唉....(內疚ling....)

monster ?!

2011年8月23日 (星期二)

仲有一個星期就開學喇

黎緊呢個學年我會學一,二,四年級

基本上當我教開既小朋友

我同Candy姐姐會跟住佢升班的
(除非佢唔補喇 >"<)

8月中九成學生都會返黎預備心情開學

不過放成個月...玩得咁高興

點會咁快回魂吖 @@

我同Candy姐姐呢排每日都係度召魂吖  (hahaha....)

唔係想話d小朋友唔好

不過家下d小朋友就真係好驕縱

講緊早幾年d小朋友都聽話得多

依家呢班

交帶落要係屋企溫既無一樣做到

都算....個亞媽都仲要話我地比得太多野佢做
(一日一練習算唔算多呢?)

成績唔好又黎問我地點解

so funny!!!

都係度補左咁多年喇

如果合作小小聽話小小一早就見到進步喇

到依家都仲可以合格唔係你勤力

係你補習老師勤力咋  >_<

好在呢個唔係我教    (Candy姐姐你唔好彩喇 ...hahaha...)

如果唔係我嘔哂全身d血都唔得掂吖

今日收學費仲問我點解加到咁費

亞太.....升左級學費就緊係唔同左喇

加價其實我都唔想

不過d租加...如果我唔加...應該可以疊埋心水湊仔

因為補習社叠得架喇  >_<

講緊都係加$50姐

人開補習我開補習...

我同Candy姐姐都應該算係燶個咋

好多時我地都無同家長去計

考試放早我地會提早返工去學校接小朋友

再帶佢地返補習社食lunch

好多人比兩個鐘錢我地同佢溫足三四個鐘

托補每月都係+$50

係出面食個飯都唔止喇

今個summer又有一個因為家長要工作凑唔到

朝早放係鄰居到

我返工前去接埋佢

以上種種都無另外收錢

為的都係想方便家長

幫到既我地都想幫



有時真係覺得幾灰

所以心態開始變

好多時做返本份算喇

似前未結婚生仔時都成日講

依家可以明正言順講:

「留返d氣教自己個個算喇！」

(wahahaha....)

不過話時話...

如果遇到一個有心人

我都會好珍惜同用心既

依家?!...

都仲係施展召魂大法先啦  >"<

管教

2011年8月21日 (星期日)

今朝收到電話因為老師病左，
今日playgroup 無得上，
要順延一堂，
即係九月頭第一個weekend星期六日都要上堂？！what the......><
不經不覺，
宇正22個月大啦！
仲有兩個月就2歲Lu!
自覺自己唔係一個有EQ的媽媽，
好多時都忍唔住發脾四@@，
不過都有熟我既朋友話我耐性高左！
多謝你地的鼓勵，
我會繼續努力的。^_＜

22 個月的宇正踏入trouble two，
好多時都要自己做，
尤其是在自理能力方面，
只要係唔危險的，
我都盡量比佢試，
呢下又係EQ大訓練啦！
唔趕時間的時候，
我都會比佢自己食飯，
因為每次食完我都要執一大輪。
而家中午食飯都要再預早d比佢食，
不過後半仍然是我餵埋去，
因為有人食到飽飽地就玩野  >"<
不過宇正既trouble都只係係屋企姐，
係外面佢都算聽話，
應該係話細膽，
warm up一輪就會好d^_^

點先可以令佢唔太易失控？
其實在於一開始的時候有無縱容左，
呢下要睇下教個個會唔會心軟啦！
好多時都人聽到人講：「由佢啦，佢細個唔識嘛！」
呢下就出事啦！
早排睇到篇文章話BB仔明白的詞彙比佢識講既多好多，
並唔係大家口中所講既「唔識野」，
當你以為等佢大d先教既時候，
以經遲左啦！＞＜

其實我都未係做得好好，
有d行為我當初都忽略左！
而家要再比d心機同時間改左去@@

今日收到Johnnson 的E-mail
資料好有參考價值
post上黎同大家分享先

*******************************************************************
你的寶寶是不是堅持要自己爬進的汽車安全座椅，或把什麼都從你手裏搶走？
他現在會比以前更堅決地按照自己的主張去探索世界。堅決的主張和毫不妥協的性格，是學步兒時期的特點。

尊重寶寶的偏好，在一些小事情上向他讓步，能避免你和寶寶之間的拔河戰。讓他選擇在麵包片上塗哪一種果醬、睡覺時穿哪套睡衣，這會讓他擁有渴望得到的控制感。

這裏的秘訣是只給他你可以接受的選擇，並不意味著為了避免寶寶大發脾氣，你就應該讓他隨心所欲。重要的是，一定要明確告訴寶寶，某些事情，像那些影響安全的行為，是絕對不能討價還價的。

寶寶的成長發育讓他必須逐漸地停止做一個嬰兒，同時，獲得自己的獨立性。如果你迅速地回應寶寶想自己做事情的願望，就能為他減少一些沮喪感，少發些脾氣。 意識到自己再不必為寶寶把每一件的事情都做妥時，可能會讓你心裏感到很難平衡，但你從他臉上看到的自豪的表情，會足以彌補你覺得自己是多餘的感覺。 此外，對你們兩人而言，寶寶的獨立性有時候會變成你和寶寶之間的意願之戰，說不定會讓你們倆都掉眼淚。不過，還是有應對和避免最激烈戰鬥的辦法，特別是如果你能把自己放在寶寶的位置上，明瞭他小腦袋中的所思所想的話。 這個階段的寶寶喜歡做‘大孩子’，每件事都想先按照自己的願望去探索，所以在插手幫忙寶寶之前，先允許寶寶自己去嘗試，如讓他自己刷牙。 ****************************************************************************

選校

2011年8月18日（星期四）

****************
呢晚Fong's brothers乒乓之夜，
老公同宇正叔叔自小就玩，
不過佢地有超過十年無對戰過。
相信大家都重拾不少回憶！
不過老公少運動，
要加把勁練一下啦！
******************

宇正係0910出世，
即係黎緊12年9月就可以做細仔入K1。
除左啟思外，
當然都要報多幾間穩陣d!

不過究竟要報幾多間先夠，
我心目中都無打算，
同老公商量後，
打算黎個大包圍！
揾揾下資料，
居然比我揾到六間@@。
係咪多得滯呢？
不過其實有幾間都應該係陪跑，
報名校都只係想見識下，
收嘅機會老公話係0%......(wahaha....)
呢六間我都係揀有學卷嘅，
有唔用太浪費啦！（唔合付我嘅經濟原則....hahaha...)

另一方面就係程度問題啦，
之前有問playgroup老師意見，
知道啟思的課程是在比其他幼稚園慢一年，
呢下又令我有少少擔心，
雖則我會教姐，
但都擔心升小一函接唔到架！
所以都想再揾d活動得黎又唔好課程函接唔到嘅幼稚園。
之後就要mark好哂d報名日期，
有d就郵寄攞表格，
有d就要係指定日子親身去學校報名，
有d就係網上download 表格就可以啦，
另外就要九月開學先打去問！
再遲d就要影面試用的相，
又為左見得有誠意d，
打算整一份CV for面試用！
哇！諗起人都癲吖！＞*＜

戒片成功一半

 

2011年8月15日 (星期一)




21個月既momo

戒片成功喇

yeah~~

早係夏天開始

momo麻麻就開始喇

不過開頭momo都幾抗拒坐厠所

所以都無特別迫佢

下午去到麻麻到午睡前就無幫佢着片

濕左就換衫褲

定時同佢坐下廁所

經過多月的嘗試

係上幾個星期麻麻同我講momo係廁所成功疴到兩次shu shu

yeah~~~

之後我就成日都係屋企問佢要唔要去shu shu

上星期一開始

momo終於多次成功去廁所喇

不過好奇怪的就是大大唔肯講

呢幾日都仲係疴係片

不打緊

好的開始是成功的一半

繼續加油~

===========================================

2011年8月16日 (星期二)

一篇blog要分兩日打

可想然之我有幾攰 >"<

上回講到上星期開始宇正b可以好明確表示要去廁所

到星期六去飲茶時間

係茶樓都可以表示要shu shu

媽媽我都係第一次係街同佢去廁所

心情好興奮   (爆)

不過呢

都係未敢唔着片出街

不過係未應該買學習褲比佢出街用呢

咁樣應該會方便d?!


=========================================

忍不住 @ STARTING BLOCKS PLAYGROUP

2011年8月14日 (星期日)

本來應該係第9堂

不過因為請左一日假

所以都仲係第8堂

要到8月尾先上完

今日真係早左好多去

2點9就到喇

所以好多時間比宇正玩出面的玩具

晶晶姐姐走黎問我

會唔會比宇正上下佢個面試班

我就話考慮一下先

見有時間人又唔多

所以將班人數和年齡問題同佢講

人數方面...佢話婷婷老師個班係8人的

另外之前多左既只係試堂

呢個問題對於我黎講問題唔大

不過我就建議佢最好改下章程

或一早同家長講明呢班最多幾多人

因為我報名既時間係講明六人小組

依家你又話呢個老師係8人既

呢下就唔係太好喇

最大問題就係小朋友年齡的問題

話左唔好相差三個月

就應該切實執行

如果可以相差半年

當初就應該比我地幾個朋友一齊同班喇

呢下係我最唔喜歡既

不過講完令自己舒服左

因為我係不吐不快的人

有野係心唔舒服

唔講我會一直唔服架

其實講完

我度氣都落哂喇

除呢兩件事外

宇正係度上playgroup其實係好開心既

而係度教的老師都好有心機

如果唔係我都唔會係blog度講咁多喇

其實都搵左其他地方想比宇正試下

不過依家又差不多要攪K1面試的事

佢個面試班又幾吸引

價錢一樣

同幼潛唔同既就係佢個模式比較近幼稚園

學嘅野就多左幼稚園會IN既野

8堂上堂再加2堂模擬面試

一共10堂

上完就剛好到宇正真係去INTERVIEW的時候喇

再加上教既老師係上次代課老師

上過佢堂都幾好

各種原因下及考慮因素下

我同爸爸都決定比宇正上呢個面試班

因為小朋友要再適應新環境都要一輪時間

去其他地方上我都怕宇正無依家上得咁開心

希望今次無決定錯喇

P.S.

今日零照片

因為呢兩日節目太豐富喇

除左宇正放電之出

我同老公都放足電

不過今日的事好想記低佢

所以捱眼訓都打左呢篇BLOG先  @@

其實都中有幼稚園D野想係BLOG到講

不過太攰喇

等我整理好資料再講喇

GOOD NITE~

玩樂日

2011年8月13日 (星期六)

========================
呢個new blog如果唔較過d字

真係會睇到眼盲架

如果用size大既字又要隔行打先得

如果唔係又會有疊字喎

想點先

唔通yahoo真係想趕客？
=========================

呢個weekend雖然無去街街

不過一樣節目豐富架

下午同momo爺麻飲完茶

就約埋熙b一家去clubhouse大玩特玩

先去泳池玩水水

返屋企洗白白後再去playroom玩

兩個小朋友盡情放電
 

夜晚再去我到晚飯

不過大家都攰喇

叫出賣就算喇

開心又愉快的一天

---------------------------------------

係兩個小朋友玩的期間

我發現到momo一個問題

就係佢好怕熱情既小朋友

其實之前我知道佢係比較胆小既人喇  (雖則個款唔似)

朋友中的三個小朋友佢係最大既一個

唔知係未我成日提住佢係哥哥

所以感覺上佢都算禮讓小朋友

不過小朋友玩得興起時總會有意外發生

無論媽媽我地睇得幾實

小朋友出手/口之快個下係中就中架喇

有幾次宇正中過幾次招之後

我發現一有類似小朋友物體行近  (無論個個係未熟都好)

先係避開

避唔開就向我/爸爸求救

老公話呢個都未嘗唔好既

但我就覺得長此下去

會唔會影響左佢同同年齡小朋友的社交發展呢??

其實上個playgroup完時

老師都有道出呢個問題

佢話宇正的自信心唔太足夠

而我地可以做既就只有多鼓勵佢

希望佢可以放胆多少少

唉~

做媽媽就真係矛盾

大胆得滯又怕

細胆得滯又擔心

photos@13/8/2011

羸在起跑線上???

2011年8月8日  (星期一)


之前個個星期日

DADDY打電話比我

除左閒話家常外

仲複述左"她"的一番說話

嗯....應該從何說起呢?

我都唔知點講

總之...我聽完之後個心係唔舒服

只係唔舒服並唔係嬲

因為我知道"她"係好鍚我既

不過呢...我有自己既一套去教育我的小朋友

雖然俗語有句說話叫做「寧教人打仔，莫教人分妻」

但其實教人教仔都唔係一樣太好既事

除非係大家都好心交流意見

或者是有心討教

好多方面我都好佩服"她"

不過並不等於我要copy她的做法

選擇幼稚園除左有近屋企外

我都有分折過所有利與弊

是衡量過適合momo去讀我先報

閱讀方面

係屋企我一有時間就會攞既書或圖卡同momo睇

不過21個月既小朋友定力有限

睇5-10分鐘以經係佢既極限

所以有野係未要清楚講明先得先

我無講唔代表我無做

我都知道小朋友係一張白紙

可以比既....可以做既

我都做喇

"她"一大准說話講完比Daddy聽再講比我聽

叫我自己消化下喎

感覺就好似我無理過momo既教育咁

難受囉

尤其係講比DADDY聽一下我真係有D.....唉...

點解會唔開心??

因為當我喜歡或尊敬某人

我就會超介意某人的說話

呢個就系我一大缺點

近年都以經將個範圍縮小喇

不過事關呢個係我個仔

有人講到我係一個唔盡責既媽媽

係未好hurt先??

呢d係做左人亞媽先明既


大家既教育理念都唔同

無理由將自己個套放在人家身上麻

現實的講句

階層都唔同

點可以比較姐

一條龍的學校

基本上都係直資學校

要考慮到自己付擔到起先得架麻

尤其近排壓力大

仲同我講名校

無言...無奈

我...只係希望momo能成為一個有責任,有自信的人

學術知識係要慢慢來的

現在可以做既

我都有做喇

至於讀邊間學校都好

我都會一路伴他慢慢走

媽媽要做的,就是無限的愛和支持

物質方面真的是次要

名校與否

是否贏在起跑線上

從來都不是我的首要選擇

都唔知道自己講到邊喇

聽日要8點既身...

全幢大厦無電吖

就此收筆

=====================
雜。photos
=====================

浮住嚟湊仔

見有blog友一家大小連朋友齊齊玩飄浮

Katherine媽媽又玩下先

向高難度挑戰抱住30+lbs momo黎影相